Molybdenglans-gruve som var i drift 1916-1919 (i ein oppgang av kommunegrensa av 1927 er ho omtalt som det nedlagte molybdenskjerpet under Breiliheii) og på nytt i drift 1935-1936 og 1939-1940. Der blei teke ut prøvar i 1960-70-åra. Der ligg tre store steintippar utanfor. To inngangar møtest i ein stor hall. Mellom dei to inngangane ligg det ei steinblokk. Golvet i gruva ligg i tre høgder nedover. Ein kan gå oppreist over alt, men på det nedste golvet ligg det som regel vatn. Ein stoll held fram innover frå det nedste golvet. Straks vest for vestre inngang ligg det ein naturleg heller på 4 x 3 m under fast fjell som må ha vore brukt som pauserom, for der ligg ennå omnsplater, og der finst restar av sementtilkopling mellom fjell og ein bordvegg som nå er bortrotna. Gruva er i "Audnedal historielag årbok 2016" kalla Åsen.