I 1896 vart det slutt på omgangsskulen i Sørdalen, dei fekk då eige skulehus, endå til det første i Syvde med sløydrom. Huset vart bygd på dugnad/ pliktarbeid. Om vinteren kunne det vere kaldt i skulehuset og den store vedomnen måtte fyrast opp. Dette var eit arbeid som eit av dei eldste barna nær skulen hadde ansvaret for. I møteboka kan
ein lese at Marie Lade fekk 12 kroner for å leggje i omnen i 1925, ho var då 12 år gamal. Skulehuset skulle bety mykje, ikkje berre for elevane, men også for resten av bygdefolket som hadde fått eit hus der dei kunne samlast. Det var skule her fram til 1961. I januar 1961 vart det samrøystes vedtak om å gå saman med Myklebust krins frå same hausten. Det var då berre 5 skuleborn. I 1975 fekk Sørdal krins overta skulehuset som gåve og det vert nytta som samlingsstad for dalingane (Sefrak id nr 1511-0013-051).