Lokaliteten har ein klar topografisk avgrensing, i vest av ein bergknaus og av stigande terreng i sør og aust. Nordover er lokaliteten avgrensa av ein veg og vegfylling. Det flate området er på om lag 80-90 kvm og det vert rekna som sannsynleg at heile flata er funnførande. Det vart under registreringa funne 40 funn fordelt på to prøvestikk, mest i PS 1. Storparten av funna er i mylonitt, men det vart også gjort funn i flint og 1 bit i bergkrystall. Stratigrafien var noko ulik i dei to prøvestikka. PS 1 har følgjande stratigrafi: 10-15 cm torv, 15-20 cm brun til svart moldjord, 20-40 cm grus og sand, 40-55 cm grå sand/ silt. Storparten av funna vart gjort i det 20 cm tjukke laget med grus og sand, men laget over var også funnførande. I Ps 2 var stratigrafien som følgjer: 0-7 cm torvdekke, om lag 7- 37 cm moldjord og om lag 37-42 cm mold og trekol. Det vart teke ut ei kolprøve i PS 2 i det nederste laget. Resultat frå prøva gav datering til BC 3350-2920 (kalibrert), dateringa antyder bruk av lokaliteten i mellomneolitikum. Funnmaterialet støttar opp under dateringa.