I motsetnad til lok 4 i nordvest er det ikkje påvist kulturlag. Den skrånande lokalitetsflata er veldrenert og sedimenta er mykje tørrare. Funna ligg like under eit tynt torvlag med mykje røtter, i eit lyst sandlag (utvaskingslag) som vert mørkare mot botnen (anriking). Ei svak podsolering kan difor sjåast i prøvestikkprofilen. Prøvestikket (CHL 44) er ikkje vertikalt avgrensa på berg, men av synkande funnkonsentrasjon. Det magre funnmaterialet, som utelukkande består av flint i varierande kvalitet, er prega av bipolar reduksjonsteknikk. To av avslaga er brente, medan ingen er vassrulla. Funnbiletet verkar elles homogent. Den bakre strandlinjedateringa for lokaliteten gir dermed 4900 BP. Dersom ein nyttar ein margin på to meter mellom lokaliteten og vassflata vert lokaliteten strandlinjedatert til 4200 BP. Ut frå ei samla vurdering vert lokaliteten datert til mellomneolitikum.
I eitt prøvestikk vart det totalt funne eit retusjert smalflekkefragment og 9 mikro- og vanlege avslag i flint, samt eit avslag i kvarts. Funna er gjort i eit stratigrafisk sjikt som virkar svært omrota og inneheld mykje humus og lauspakka åkerjord. Det vart ikkje påvist funn i sikker undergrunnsmasse.