I den fyrste tida etter Svartedauden omfatta garden Fåland si mark både Fåland, Ro, Røydland, Heddan og Valefjell i Hægebostad sokn og Urevatn, Kleppe, Vester Vik, Skytel og Håberg i Eiken sokn. Dette blei opplyst under ein grensegang i 1746 (sjå «Gards- og ættesoge for Eiken», band 3, side 16 og 80). Norges Geografiske Oppmåling sine kommunegrense-skildringar frå 1800-talet (i depositum på Statsarkivet i Kristiansand) opplyser feilaktig at både Hægebostad, Eiken og Kvinesdal sokner møtest i Fålandsrøysa, og i kommunegrense-skildringa frå 1937 står det feilaktig at Fålandsrøysa er vinkelen i kommunegrensa 66 m lenger sør. Men den rette Fålandsrøysa er ei steinblokk, og oppå denne ei grenserøys med ein liten bautastein i midten, som er endestav for strengen Håberg / Hobbesland i Eiken sokn der han støyter til Herrstøl i Kvinesdal sokn.