Det vart i 1996 tatt 8 prøvestikk på lokaliteten, der dei funnførande er dokumentert i profil, vidare er lokaliteten teikna i flaten. Frå prøvstikk 4 er det tatt ut prøve frå kulturlag til radiokarbondatering. Stratigrafien på lokaliteten er nokolunde sams over heile flaten. Prøvestikka 1- 4 viser at det er i hovudsak våt torv i toppen. Under dette kjem det eit eller fleire lag av grov sand - grus. I dette laget er det observert trekol i ps 1-4. I ps 5 er det ikkje observert trekol, men gjort funn. Det er rimeleg å sjå funna og den trekolblanda grusen i samanheng med eit kulturlag, som strekker seg over store deler av flaten. Funnstaden synest å væra lite utsett for dyrking. Dei topografiske tilhøva gjer at dette området truleg har vore nytta til beitemark, området er alt i dag svært fuktig og høg vassføring kan føra til lokale lagforstyrringar noko som lag 2 i ps 3 kan vise, då ein her har eit sandlag under topptorva, men over det våte torvlaget under. Lokaliteten inneheld fleire råstoffgrupper, men ikkje rhyolitt. Med ei høgd over havet på vel 14,3 meter kan lokaliteten plasserast til siste del av mesolittikum.