Her er funne mykje sinders, helst under vatn. Dei har teke vare på sinders-klumpane på garden Heivollen i Finsland og på bruket Håvollen på garden Grindland i Finsland. Slaggen er frå romersk jernalder og er metallurgisk analysert. 55,1 % er jern, 31,4 % er silisium, 8,3 % er aluminium, 1,4 % er kalium, 1,3 % er kalsium, og så er der ei mengd sporstoff. Den kjemiske samansetjinga er truleg porøs fayalitt, Fe2SiO4, som er typisk for slagg etter jernvinna. Det er også observert ein omn på staden, men overgrodd og fyld med stein og derfor vanskeleg å få auga på. Jon Grindland, Finsland, kan påvise han. Omnen ligg på ei lita forhøgning like ved stranda, og ein kan sjå eit tappehòl der flytande slagg har runne ut. Omnen er fôra med stein og utgjer eit rektangel på om lag 1 x 1,5 m.