Lokaliteten er avgrensa av prøvestikk og topografisk av høgdedraga i vest og aust. Det er tatt 8 prøvestikk på flata, 4 prøvestikk førte funn. Utstrekninga på lokaliteten kan vere frå i 40 til 150 kvadratmeter. Mose, gras og blåbærlyng utgjer botnvegetasjonen, store furutre dominerer flata med noko spreidd einer og blanda lauvskog nord i flata. Flata er prega av tuver av ulik storleik, dei fleste av desse er sannsynleg stein og blokker som er dekka av vegetasjon. Lokaliteten ligg lunt til og har utsyn mot sjøen i sør. Undergrunnen på lokaliteten er særs våt, ikring 10 meter nordaust for lokaliteten ligg ei våt myr med fleire opne vassflater. Stratigrafi: Torvlagets tjukkleik i prøvestikka varierte frå 10 til 24 centimeter, under dette kom eit grått sand og grushaldig siltlag av noko varierande samansetning. I prøvestikk 1, 3 og 4 var det under dette igjen eit mørkbrunt silthaldig sandlag som inneheldt noko grus. Det var ein del stein i undergrunnen sjølv om dette varierte noko frå prøvestikk til prøvestikk. I prøvestikk 2 vart det observert kolbitar. Generelt var det gjort funn i alle laga under torva.