Bautasteinen, som nedst er firsida, men som går over til å bli tosida mot toppen, er 0,9 m høg. Øvst er steinen 22 cm brei, nedst er kvar av dei fire sidene omlag 15 cm breie. På sørvestre sideflate, heilt nedst, finn ein krossen, som står i opphøga relieff. Krossen måler 29 x 15 cm. Båe krossarmane vertikalt er lengre enn krossarmane horisontalt. Krossarmane horisontalt stikk nemeleg ut midtveges på dei vertikale. Kvar krossarm er breiast ytterst og smalnar etterkvart inn mot midten. I fylgje lokale segner skal steinen vere minne om eit drap og han skal stå anten på drapsstaden eller på grava til drapsmannen, som måtte liggja utanfor vigd jord. Andre opplysningar seier at steinen har stått fleire stader, m.a. i eit dele. Deretter stod han visstnok gøymd i eit hjørne av kyrkjegarden og er nå reist utanfor kyrkjeporten. Det er vanskeleg å seia om denne plassering er opphaveleg.