Røysa er oval på skap og er orientert NNV-SSO. Ho er kring 14 x 6 m vid og 0,5 m høg. Kantane er stort sett godt markerte og røysa som tykkjest vera bygd av stein og jord, er no tilvaksen med grastorv og lyng og nokre små granplantingar eit par stader. Heile midtpartiet av røysa vart utgravd i 1961 av Karl-Johan Løvset under rettledning av Egil Bakka. Her går ei kring 8 m lang, 1 - 2 m brei og 0,5 m djup grøft. Nokre få 50 - 90 cm store blokker stikk i dagen her og kvar. På vestre kant av røysa ligg tre helleforma blokker, 140 x 100 cm, 140 x 60 cm og 120 x 50 cm vide. 8-10 m av midtpartiet er utgrave og her låg B11475. Bronsespenne, S-forma spenne med kjede og ein sølvring låg i søre del, ei krukke låg knust under ei svær helle nær midten, ei spannforma krukke låg velta, men heil, like sør for denne. - Det skal ha lege tett i tett med heller nedover vestsida på knausen.