Ved registreringa vart det funne åkerreiner, rydningsrøyser, eit båtopptrekk, ei gravrøys, eit trappeanlegg og kolmiler. Ved seinare undersøkingar er det dessutan funne tre hustufter som ligg på ein nord-sør gåande bergrygg på Øyjorda. Vidare har pollenundersøkingar gjort det mogeleg å påvisa garden sine slåttemarker. Heile øydegarden sitt innmarksområde med tun, åkrar og slåtteland tykkjest etter dette å ha ei utstrekning på kring 650 x 200-250 m og omfattar i alle høve dei sørlegaste 2/3 av den austlege delen av Lurekalven. Åkerreinene som vart registrerte, ligg i solvende skråningar og oftast er dei avgrensa av myr og småknausar. Dei små rydningsrøysene ligg alle utanfor åkerarealet og i regelen inntil jordfaste steinar. Båtopptrekket ligg nede i Florsvika og markerer seg ved to parallelle steinrekker ovanfor fjøresteinane.