Stavkyrkja er ei langkyrkje med heva midtrom bore av 14 stavar. Borgund stavkyrkje har prega den ålmenne oppfatninga av korleis ei stavkyrkje skal sjå ut: spontekka, med tak over tak, utskorne portalar og dragehovud. Midtrommet har saltak med ein høg takryttar, samt omgang. Kyrkja har ein stor vangeportal i vest og ein enklare portal med halvsøyler i sør. Innvendig vart det meste av det etter-reformatoriske interiøret fjerna ved restaureringa i 1870-åra saman med ein tønnekvelv frå mellomalderen. Tømmeret til dagens stavkyrkje ser ut å vere hogd vinteren 1180-81, og kyrkja er truleg oppført ikkje lenge etter.