Krosskyrkje i laft med hovudskip og kor i stavverk. Etter at ny soknekyrkje vart bygd i Lom i 1879, vart Garmo stavkyrkje rive og materiala vart selde på auksjon. Seinare vart material samla inn igjen og kyrkja vart rekonstruert på Maihaugen på Lillehammer i Oppland, der den vart innvia i 1921. Utvendig ser stavkyrkja på Maihaugen ut som kyrkja gjer på fotografi og illustrasjonar frå før Garmo stavkyrkje vart rive. Den er likevel ein relativt fri rekonstruksjon, og det er usikkert kor mye av materiala som kommer frå stavkyrkja på Garmo. Alt inventar kjem frå andre kyrkjer. Noko datering av stavkyrkja som vart rive er ikkje mogleg å gje, men Garmo kyrkestad kan gå om lag 900 år tilbake i tid.