Lokaliteten ligg på toppen av ein kolle. Her er ein flate som vender i nord-sør retning. Sjølve flaten skrår ned mot nordaust. Funnområdet er ein større flate på toppen, og ein mindre terrasse i søraust. Lokaliteten avgrensar seg naturleg mot vest, der ein har ein bratt fjellskrent på 1-2 meters høgd. Nede i dette går det i dag eit fuktig, men drenert myrdrag. Mot aust skrånar flaten svært bratt etter vel 10 meter. Nordre del av lokaliteten har fleire knausar synleg i dagen. Der prøvestikk 3 vart grave ligg det ei lomme med lausmasseavsetningar. Desse var funnførande. Det samla funnområdet utgjer eit areal på om lag 250 m2. Lagdelinga viser at området er mykje overdyrka. Torvlaget varierer mellom 3 til 10 cm. Det er i prøvestikk 1 og 4 påvist eit lag av sand og jord. I dette laget er det noko trekol. I prøvestikk 2 og 3 er det sand under torva. Lag 2 i prøvestikk 1 og 4 vart tolka som dyrkingslag, medan sandlaget ser ut til å vere meir uforstyrra.