Arkeologar frå Østfold fylkeskommune, ute på ei forundersøking i samband med ein vindmøllesak i området, påviste lokaliteten med flint i prøvestikk. Planen vart lagt ned før den arkeologiske registreringa vart fullført. Difor er det berre 1 funnførande prøvestikk som definerer lokaliteten. Eit par andre prøvestikk rett vest for P1 var funntomme. Lokaliteten er difor avgrensa topografisk på kartet.
Lokaliteten ligg ved breidda av tjernet Fiskeløs, som ligg på 161 moh. Det er uvisst om lokaliteten vart nytta i steinalder eller bronsealder når tjernet låg der meir eller mindre som i dag, eller om lokaliteten er strandbunden frå då havet sto så høgt. Strandlinjekurvene viser at det er mogleg. I så fall er lokaliteten den hittil eldste vi har i Aremark. Pionerfasen i tidlegmesolitikum, populært kalla Fosnafasen, eller den kontinentale Ahrensburgkulturen, daterast til 9800-8200 fvt.
Per i dag er det skog her, større furutre og yngre grantre. Jordmassene viser eit eldre dyrkingslag under torva. Dette stammer truleg frå husmannsplassen som ei gong låg i dette området.