Lokaliteten er liten, vel 40 kvadratmeter og funna er konsentrert til eit svært avgrensa område på flaten. Det synest som om lokalteten har vore orientert mot aust ut i vågen. Stratigrafien er prega av å vera gamalt beiteland. Her er torva tjukk med kraftige røter. Vidare er undergrunnen noko kompakt. Funna ligg i det området der det er sand og grusavsetningar, medan der matjorda ligg rett på berget er det tomt for funn. Dette tyder på at funnstaden har vore ein aktivitetsplass i strandsona. Funna frå lokalitet 3 er få. I hovudsak er det små flintavslag og nokre bitar slått kvartsitt. Ut i frå materialet er det ikkje råd å tidfesta lokaliteten noko nærmare i tid. Høgda over havet er låg i høve til dei andre registrerte lokalitetane, med ei høgd på mellom 7-9 meter får lokaliteten ei yngre tidsspenn enn dei andre. I stratigrafien er det ikkje noko som tyder på at materialet er transgredert og vassrulla. Tidfestinga av funnstaden vert difor fram i mot slutten av yngre steinalder.