Røysa er rund av form, måler mellom 5 og 6 m i tverrmål og er kring 0,5 m høg. Det er noko vanskeleg å gje eksakte mål, då kantane er mykje overgrodde. Røysa er bygd av kanta stein, frå mannsløft og nedover, dei fleste 0,25 - 0,6 m i tverrmål. Sentralt i røysa er eit langstrekt, jamnt søkk, der rette steinkantar kan skimtast som avgrensing innover mot dei fire sidene. Søkket er orientert omlag A-V og måler ca. 1,5 x 0,6 m. Etter alt å døme er dette ei gravkiste, og både denne, formen og utsjånaden på røysa og lægjet, på ein bergknaus med godt utsyn, syner med full visse at dette er eit automatisk freda fornminne.