Veslebur i ei høgd med lukka frontsval. Lafteverket er høge halvkløyvingar som er flatøksa på innsidene, ovaltelja på utsidene. Beitskiene ved den indre døra er heilt unike. Begge har 2 raudmåla katteliknande dyrefigurar, den eine over den andre, i høgt relieff ut frå beitskiplankane. Noverande sval er større enn den opphavelege. Den var omlag 1 meter brei og hadde tileveggar på sidene, truleg og framme, men her er alt det opphavelege vekk. Buret skal ha stått i Gamletun fram til garddelinga tidleg på 1600-talet. Buret vart i 1862 flytt frå austsida til vestsida av loftet og då sett på høg underbunad med sviller, stabbar/klauver og museflak. Taket er tekt med torv. Ved sida av buret står det eit vedtaksfreda loft.