"Eldste tufta på Liland skal vera Stove-tufta. Stove-mannen hadde tri søner. TIl den eine bygde han hus framanom gamlehusa, til den andre nedanfor. Den dag i dag heiter det på Liland "heim i Stovå" og "der framme" og "der nere". Men som eit fellesnamn på alle tri tuftene: "Der heima". Stove-mannen, segjer segna, hadde tri gilde ting; det var tvo langbord og dørhella. Eldste guten som vart sitjande i Stova, måtte velja i desse. Han valde dørhella. Dørhella ligg i Stova den dag i dag, men der er no avslege mykje. Ho var så stor at 9 par kunne dansa på ho samstundes. Enn trur eg der var danserom for 3 eller 4 par. Ho er så tunn at ho rekk ikkje på tjukkaste over 6 tumar. ..."