Gråtarreinè er bròtet mellom dei to flatane med dyrka mark. Dette bròtet strekkjer seg over fleire bnr., men Kong Åmunds haug låg iallfall på bnr 10 (bnr 10 har seinare gått inn i eit anna bnr). I Kong Åmunds haug var det eit gravkammer som det låg ei helle over. Inne i kammeret låg det keramikk, kol og brende bein. Hella blei teken bort og brukt som dørhelle framføre Asbjørn Åslands setehus, men ho har seinare kome bort. Det låg i alt seks gravhaugar i Gråtarreinè (Amund Helland: "Norges land og folk", 1903). Ein haug som blei graven ut i 1820-åra, inneheldt ein koparkjele og leirkar frå eldre jernalder. Då dei pløgde på Gråtarreinè i 1917, kom dei ned på ei mannsgrav der det låg to eieggja sverd, ein spjotspiss, fire pilspissar, ei øks, eitt eldstål, ein sigd og eitt høveljern. H. Gjessing trur at det var ei flatmarksgrav frå seint på 700-talet. Rundt 1920 blei alle gravhaugane, medrekna kong Åmunds haug, utjamna.