Etter tradisjonen skal dette vere ein gravhaug. Haugen er nemnt av arkeolog Per Jahn Lavik som var på staden i 1959, men han skriv at den ¿kan være naturlig¿ (Notat i Bergen museum sitt topografiske arkiv). Geir Arne Eikemo fortalte oss at haugen alltid har vore rekna som ein gravhaug, og han visste at både far og bestefar hans hadde same oppfatning. Bestefar til Eikemo heitte Per Eikjemo og vart født i 1868. Haugen ligg på ein liten knaus. Den er om lag 10 x 5 meter og 1,5-2 meter høg. Undersøking med sonderborr tyder på at den er bygd opp av fin sand som ellers ikkje ser ut til å vere vanleg på staden. Den er grasvaksen og det veks eit par småtrær på den.