Lokaliteten er ein typisk stølsvoll som ein gong i ukjend tid er lagt øyde, og fått namnet Gamlebotten. Dette kan sjåast i høve til noverande støl, Dyrebotten, oml. 800 m lenger sør i same beitesameiga. Her var det 2 steinbuer i bruk i 1870. I dag har eigarane stølshusa sine i Tvist, lenger SA. Sjølv om Gamlebotten utan tvil har vore brukt som støl i ekspansjonstida i 16. og 17. hundreåret, tyder tuftene 3, 4 og 5 på at folk har hatt tilhald der tidlegare. Tuftene 1 og 2, halvt inngravne i morenehaugen, med mura vegger og opning mot sør, er typer ein kan finne andre stader på stølane rundt i snaufjellet, med tradisjon om bruk i ny-tid. Men tuftene 3, 4 og 5 minner meir om andre tufter i distriktet som er daterte til tidleg mellomalder, eller før. Til dømes Å.7 - Bergsjøstølen, Å.10 - Reinsgjerda og Å.17 - Vallehalli. Tuftene har svak nedsenkning i bakken, lite stein, og må soleis ha hatt eit overbygg av forgjengeleg materiale.