Christinegård ligg i Sandviken, eit stykke oppe i lia under Sandviksfjellet. Det er eit stort og heilskapleg anlagt lyststadsanlegg, der hovudhus, uthus og hage utgjer eit arkitektonisk heile. Hovudbygningen er eit trehus i to etasjar, med kvitmåla panel og valmtak tekt med svart tegl. Huset har ein T-form, med ein hovudfløy mot vest og ein tverrfløy på austsida. Det arkitektoniske utstyret i empirestil er rikt og særprega, med m.a. søyleborne terrassar på begge sider, og sjalusiar ved vindauga. Frå hovudhuset strekk lange, smale fløyer seg mot N og S, på vestsida utforma som opne søylegangar. Hovudhuset og fløyene dannar austsida i ein firkanta hage med geometrisk utforming. På dei andre sidene er hagen ramma inn av ein kvitkalka mur med avrunda "bastionar" i hjørna mot V. A for hovudhuset er ein gardsplass, som i N og S er avgrensa av kortendane på to bygningar av kvitkalka mur, i ein etasje på høg sokkel og med valmtak. Det eine er stall og vognremisse, det andre paktarbustad. Ca. 160 m mot A, og ca. 40 m høgare i terrenget, ligg lysthuset Mon Plaisir, som eit lite gresk tempel med fire joniske søyler i fronten mot V. Skråninga opp mot Mon Plaisir var opphavleg ein romantisk prega park, i dag eit meir uryddig grøntområde. I den nedre delen er ein grusdekt treningsbane, til dels skoren inn i terrenget. Resten av eigedomen vart utparsellert kring 1930 og bygd ut med frittliggande fleirfamiliehus.