Anlegget består av den opphavlege hovudbygningen frå 1752, som er ein stor toetasjes bygning av lafta tømmer, med symmetrisk hovudfasade mot SV, og med ein tilbygd tverrfløy frå 1891 på baksida. Mot nord, i vinkelen mellom hovud- og tverrfløya, er ein bakplass, avgrensa med jernstakitt mot gata, med eit par store tre og elles innreia som leikeplass. Eit stort, einetasjes uthus på bakplassen, antakeleg frå 1750-åra, vart rive i 1965. Framfor hovud- og sidefasadane er ein forplass, likeeins inngjerda av jernstakitt og brukt som leikeplass. På baksida, i NA, grensar eigedomen opp mot bustadhusa i Skivebakken, på dei tre andre sidene er det offentleg gate.