Hovudhuset "Sophies Minde" er ein langstrakt og smal einetasjes trebygning kledd med kvitmåla vestlandspanel. Huset har mansardtak tekt med raud tegl, midtark med valma tak, og skyvevindauge av engelsk type. Han er svært godt bevart med, mange opphavlege detaljar i empirestil, særleg i interiøret. Ein marmorplakett på fasaden daterer huset til "den 7de August 1810". Den noverande tomta som høyrer til Sophies Minde, og som er freda etter § 19, er breiast øvst ved hovudhuset, gjer ein knekk rundt naboeigedomen i sør, og skrår deretter jamt innover ned mot strandlina i austenden av tomta. Bustadhuset ligg lengst vest på tomta, med ein bratt skrent på vestsida, og hageanlegget er på framsida av huset, ned mot vatnet. Huset ligg på eit grusdekt platå øvst på tomta. Nedanfor ligg ein blomehage med ovale bed, av gammal, men uviss alder, så ein grusveg som går tvers over tomta og fører til nabohuset i nord. Hageanlegget har elles i hovudsak form av ein open "landskapspark" med plen og nokre eldre frukttre, og viltveksande små-tre og buskar, særleg langs kantane. Langs nordaustkanten av eigedomen går det ein steinsett sti ned til strandlina. På eigedomen ligg tre uthus, der eksteriøret er omfatta av fredinga. Kjellerloftet er eit uthus i halvanna høgd med ein kjellar av kvitkalka natursteinsmur, delvis bygd inn i terrenget, med eit loft oppå, bygd i tre. Det har saltak med raud tegl, gavlane har grønt supanel. Kjellerloftet skal vera bygt på slutten av 1800-talet. Det var påbygd i vest etter dispensasjon frå kulturminnelova i 2008. Huset vart nytta som uthus/lager, seinare m.a. nytta som kontor for arkitekt Konow Lund, i dag som utleigeeining. Vaskehuset er bygt av Frederik Konow Lund i 1930-åra. Vaskehuset har ein stor skorstein, og tidlegare var det ein stor omn inne. Den er borte no, og huset vert nytta som lysthus og badehus. Det er eit lågt hus i éi høgd og har nærmast form av eit saltak med raud tegl, sett på ein låg kvitmåla betongsokkel. Gavlane er kledde med grønmåla supanel. Jordkjellaren er bygd i gråstein og dekt med torv. Alderen og historia er ikkje kjend, men med tanke på plasseringa tett ved det gamle tunet, er det ikkje usannsynleg at kjellaren er eldre enn hovudbygningen. (For nærare beskriving av hage og uthus freda etter § 19, sjå fredingsvedtaket.)