Stend hovudgard ligg på Stend i Fana, på ei slette der den tronge Rådalen opnar seg mot botnen av Fanafjorden, ca. 13 km sør for Bergen sentrum. Den freda hovudbygningen er ein stor, trefløya bygning av i ein etasje, av tømmer med liggande, kvitmåla panel, og utsvaia valmtak tekt med raud tegl. Midt på hagefasaden er ein spissgavla ark bore av søyler. Hovudforma på bygningen skriv seg frå han var ny i 1680-åra, men alle utvendige detaljar er frå ei ombygging i 1920-åra, som gav han eit utvendig stilpreg av typisk ¿bergensstil¿. Av interiøra peikar salen seg ut, med bevart måla dekor frå 1680-åra. Mellom fløyene er ein grusdekka gardsplass, på motsett side ein grasplen. Her låg tidlegare ein storslått barokkhage, medan ein lang, buktande allé gjekk frå gardsplassen ned mot sjøen. Dei gamle driftsbygningane på garden låg sør for hovudhuset. Bortsett frå i aust er hovudbygningen i dag omkransa av skule- og driftsbygningane til landbruksskulen, dei fleste frå etterkrigstida. Elles er omgjevnadene også i dag prega av dyrka mark.