Garden Hauge ligg på Vossestrand i Voss kommune, ved austenden av Oppheimsvatnet på nordsida av dalen. Den freda bygningen er ei eittroms årestove av kraftig ovaltelgja tømmer, utan kledning og med torvtekt saltak med ljore. Ho er bygd saman med ei lemstove - ei ombygd røykomnstove - med kleve og gang, slik ein ofte finn det. Lemstova har liggande panel og skifertak. I motsett ende av lemstova er òg ei skykkje med halvtak. Det samanbygde huset ligg i eit tun med bualoft, våningshus og løe. Tunet slik det ligg i dag vart skapt etter utskifting rundt 1915; før det stod husa nokre hundre m lenger mot aust. Den gamle tingplassen ligg som ein voll bak og ovanfor garden. Her er òg eit par gravhaugar.