Stabburet på Sunnylven prestegard vart flytt opp til prestegarden tidleg i 1860-åra. Sunnylven prestegjeld vart oppretta i 1861, og den noverande Sunnylven prestegard vart prestegard då. Stabburet hadde tidlegare stått nede i Hellesylt, og hadde vore tiendebu. Det er sikkert eit hus frå 1700-talet, kanskje frå 1600-talet. Skriftlege kjelder omtalar ei tiendebu på Hellesylt på 1600-talet, og det kan vere dette stabburet. Huset har i alle fall høg alder, og det er teken godt vare på. Det er eit tømra, panelt, raudmåla hus i ei høgd, med innbygt sval på framsida. Det står på seks trepilarar. - Dei andre husa på prestegarden er frå 1900-talet.