Lok 35 er definert som eit funnområde av kategori B. Lokaliteten er delvis avgrensa av negative prøvstikk i alle retningar. Det vart totalt funne 76 artefaktar, av desse var 73 mikro- og vanlege avslag, av desse 36 vassrulla. Det vart i tillegg funne to bipolare kjernar og eit avslag med retusj. Mange prøvestikk vart tatt i området, men det lukkast ikkje å påvise nokon funnkonsentrasjon. Truleg er brorparten av funna redeponert, det høver også med den markante mekaniske slitasjen på materialet. Dersom materialet er redeponert, er det andre krefter enn tapes transgresjonen som er årsaka, til dette ligg det funnførande nivået for høgt. Det er berre Storegga -tsunamien eller aktivitet i strandsona etter regresjonen i preboreal tid som kan forklare vassrulla materiale på dette høgdeintervallet. I ljos av lok 10 ovafor er det nok den siste teorien som er mest truleg. Funna er gjort i gruslag like under torva.