Nedre del av haugen tykkjest vera ein naturleg avsett haug. Oppå denne er det så bygd ein gravhaug eller rettare ei gravrøys, då heile den oppbygde delen er laga av rullestein, som i dag har eit dekke av mosetorv. Tverrmålet på den oppbygde haugen er 13 m, medan den naturlege haugen har eit tverrmål ved bakken på kring 20 m. Total høgde er kring 3 m. I toppen på haugen er det eit søkk, 2,5 m vidt og 1,5 m djupt. Området kring haugen er tett tilvakse med tre og buskar som i dag hindrar noko vidare utsyn.
Haugen er 16 m i tverrmål og godt 1 m høg, men han er svært avflata på toppen. Sidekantane som er dekt med grastorv, er heller bratte. Lengst mot NV på haugflata er det satt opp ei leikestove. Langs haugkanten heile vegen rundt står det store bjørketre.
Haugen som vert kalla Ormahaugen, er ca. 15 m i tverrmål og 2,5 m høg. Eit båtnaust er skore inn i søre kanten, og haugen ser ut til å vere avskaven i SV-kant. Det er to søkk i toppen, kvart kring 1 m vidt. Heile haugen er torvdekt og på N halvpart veks 5-6 bjørker. På O-sida av naustet veks nokre graner. Haugen ligg i innmark.
Tverrmålet på haugen blei målt til 12 m og høgda er 1,5 m. Bortsett frå ei treklynge i søre kant er haugen fri for større vegetasjon og særs velhalden. Eit lite søkk er grave inn i N kant og elles er haugen litt ujamn over det heile. Haugen ligg i innmark og lendet er medels bratt.
Haugen fk. 1/1 er 11 m i tverrmål og 1 m høg. Haugen er dekt med gras og mosetorv. I toppen er det eit grunt søkk, godt ein meter vidt. Heile haugen er tilvaksen med grantre. Haugen fk. 1/2 er 12 m i tverrmål og 0,5 m høg. Haugen er heilt dekt med grastorv. I midten er det eit grunt søkk og han er utkasta mot N. I utkastet stikk det steinar i dagen. N for haugen veks det grantre, på dei andre kantane er han omgjeven av gamal grasmark. Haugen fk. 1/3 er 11 m i tverrmål og 1 m høg. Haugen er dekt av mose og lyngtorv. I toppen er det eit grunt søkk, kring 2 m vidt. Haugen er heilt tilvaksen med buskar og grantre.
Haugen er 17-20 m i tverrmål og ca. 2,5 - 3,0 m høg. Han er dekt av mose og lyngtorv og er elles tilvaksen med furu og litt bjørk. I midten er ei hole, ca. 1,0 - 1,5 m vid og ca. 0,75 m djup. Ein telefonstolpe står om lag midt i haugen.
Haugen som vert kalla Nesehaugen (Huldehaugen), er kring 12 m i tverrmål og 0,75 m høg. Han er svært uklårt markert og lite synleg i lendet. Haugen er graskledd og tilvaksen med ein del bjørketre. Nokre steinar stikk i dagen kring i haugen. Haugen er noko avflata og ujamn på toppen. Om lag i sentrum ligg det ei helle på kant ned i haugen. Hella skrånar mot SSV. Den synlege delen av hella måler kring 0,9 x 0,6 m, orientert NV-SO. 1,10 m NNV for hella ligg det ei blokk som er om lag 1,20 x 0,65 m, orientert VNV-OSO. Ved kanten i VNV ligg det ei kring 1,3 x 0,9 m stor og 0,65 m høg blokk orientert NO-SV.
Haugen som vert kalla Runakallhaugen, er 16-17 m i tverrmål og ca. 2 m høg. Han er bygd av stein som er dekt av tjukk grastorv, men spreidde steinar stikk fram i dagen. I vestlege kant er det eit stort sår 4 x 8-9 m O-V. Haugen er tilvaksen med lauvtre. I søraustlege kant veks ein stor hassel.
Tverrmålet på røysa er 15 m og høgda er 2,5 m. Røysa er dekt med torv og mose og nokre store tre. Ein del steinar stikk fram og i S er innpåkasta ein del stein frå hyttetomta.
Røysa er 11 m i tverrmål, høgda er 1,5 m. Ho er dekt av grastorv og noko lauvkratt i sørvestre delen. Bakken røysa ligg på er ujamn og avgrensinga på røysa er noko uklår i SV. Overflata på røysa er noko ujamn, stein stikk fleire stader i dagen. Det er eit smalt, grunt søkk i toppen av røysa som er 3 m langt (N-S).